Маёнтак пана Булгака

Агледзеўшы Мацеевіцкую капліцу, мы накіраваліся да маёнтка Булгака, у гэтай жа вёсцы. Там мы знайшлі цікавага чалавека, Мікалая Пятровіча, які трошкі расказаў нам пра маёнтак.

У савецкія часы ў маёнтку была Мацеевіцкая школа. Мікалай Пятровіч успамінае, што пасля вайны не было магчымасці хадзіць у школу, бо ў 1945 годзе пасёлак быў спалены і людзі не мелі ні жылля, ні адзення, ні гаспадаркі адпаведна. Мікалаю Пятровічу не было чаго апрануць у школу, але ён вельмі імкнуўся там вучыцца .

Калісьці, успамінае Мікалай Пятровіч, у гэтым будынку, дзе была школа, жыў пан Булгак, акрамя гэтага яго панскія ўладанні ўключалі 2-х павярховы дом з высокім ганкам, хлявы, склеп, 4-х кватэрны будынак для слуг. На тэрыторыі ўладання была сажалка, сад на 90 сотак, у якім вырошчвалі вялікія, смачныя яблыкі. Гэты сад бралі ў арэнду жыды і мелі вельмі добрыя ўраджаі з яго, але сад не захаваўся, у вайну вымерз. На тэрыторыі маёнтка быў спіртзавод, бровар, якім кіравала жонка пана - спагадлівая, добразычлівая і не ганарлівая жанчына Булгачыха, якая была ў добрых зносінах з простым людам.

На сённяшні дзень школа знаходзіцца ў паўразбураным стане. Яшчэ калі Мікалай Пятровіч працаваў начальнікам участка, то сюды прыязджалі ад шэфаў - маторнага завода - дзеці, жылі ў школе і працавалі ў саўгасе.

Але з 1997г. будынак школы пачалі расцягваць людзі.

Цікава правёўшы час у Мацеевічах, мы развіталіся з жыхарамі гэтай вёскі.

уверх